يا مصر فين عهدنا
فين حلمنا
فين كلامك
عقد وإنفرط مننا
فت نفسي يا ست العرايس
ونسيت مين أنا
أنا إبنك
وللا إللي حبك
وللا كبش الفدا
لو إبنك
إنتى خلفتى كتير
فيه اللي هان واللي صان
بس عيبي عندك إنى عليكى بغير
ولو حبيبك
إزاى رفضتى حبي
وإنى أبقي من قلبك قريب
ليه دايما شايفانى غريب
ولو كبش الفدا أنا موافق
فدا عيونك الدنيا كلها
بس خايف تضحى بيا
وترحبي بمحتل
يعيش علشان ينهش فيكى
طب فاكرة يا مصر ضل التوته
وانا قاعد انحت لك ف قلبي صورة
وانسجها بمية قصة
واحكيها مليون حدوته
مش دى أيام فرحنا .. أيام عشقنا
لما كنا بنحلم ببيت يضمنا لوحدنا
من غير عنصرية
من غير ما حد يتدخل في حكمنا
ولما جيت أكافح علشانك .. علشانى
واحارب فساد هيلوث دمنا
تجرحينى !.. تقتلينى!
وتسيبي حزبنا
تسيبيه يقتلوه قبل ما يتولد حلمنا
دا إبننا
اللي رميتى ف قلبي نطفته
اوعي تكونى نسيتيه
لـ أصدق
إن أمة هى اللي موتته
قلبي هو قلبك .. وقلبك هو قلبي
وربي شاهد بوحدته
بس قلبي من سنين تايه ف غربته
كان يا حبيبتى حزين
م انتى عارفه قصته
وإن كنتى رفضانى إختارى إنتى
ولادك أهم كتير
بس إختاري اللي يخاف عليكي قدى
ويقدرك
واللي يعرف إنك قضيته
وإوعي ساعتها تندمى
وتعدلي مزاجك ليله
وف التانية تبلمي
وخوفي انتى عارفاه
تسيبينا وتختارى تالت
لـ هو فاهمك وعلي عهدك شاهد
وساعتها تبقي بتحطمى حبنا
وبإيدك
تنزلي ستار حلمنا
ربنا يخلي مصر ويخليك ليها
ردحذف